અઙ્ગં હરેઃ પુલકભૂષણમાશ્રયન્તી ભૃઙ્ગાઙ્ગનેવ મુકુલાભરણં તમાલમ્ । અઙ્ગીકૃતાખિલવિભૂતિરપાઙ્ગલીલા માઙ્ગલ્યદાઽસ્તુ મમ મઙ્ગલદેવતાયાઃ ॥ ૧ ॥ મુગ્ધા મુહુર્વિદધતી વદને મુરારેઃ પ્રેમત્રપાપ્રણિહિતાનિ ગતાગતાનિ । માલાદૃશોર્મધુકરೀವ મહોત્પલે યા સા મે શ્રિયં દિશતુ સાગરસંભવાયાઃ ॥ ૨ ॥ આમીલિતાક્ષમધિગમ્ય યથા તથાઽહં મુગ્ધાધિમુગ્ધમનિમેષમનીક્ષણં તે । આન્તર્મુખં સકલકામદુધં પ્રહૃષ્ટં ભૂત્યૈ યથા મમ દદાતુ મઙ્ગલાનિ ॥ ૩ ॥ વિશ્વામરેન્દ્રપદવિભ્રમદાનદક્ષમાનન્દહેતુરધિકં મુરવિદ્વિષોઽપિ । ઈષન્નિષીદતુ મયિ ક્ષણમીક્ષણાર્ધમિન્દીવરોદરસહોદરમિન્દિરાયાઃ ॥ ૪ ॥ બાહ્વન્તરે મધુજિતઃ શ્રિતકૌસ્તુભે યા હારાવલીવ હરિનીલમયી વિભાતિ । કામપ્રદા ભગવતોઽપિ કટાક્ષમાલા કલ્યાણમાવહતુ મે કમલાલયાયાઃ ॥ ૫ ॥ કાલામ્બુદાળિલલિતોરસિ કૈટભારેર્ધારાધરે સ્ફુરતિ યા તડિદઙ્ગનેવ । માતુઃ સમસ્તજગતાં મહનીયમૂર્તિર્ભદ્રાણિ મે દિશતુ ભાર્ગવનન્દનાયાઃ ॥ ૬ ॥ પ્રાપ્તં પદં પ્રથમતઃ કિલ યત્પ્રભાવાન્માઙ્ગલ્યભાજિ મધુમથિનિ મન્મથેન । મય્યાપતેત્તદિહ મન્થરમીક્ષણાર્ધં મન્દાઽલસઞ્ચ મકરાલયકન્યકાયાઃ ॥ ૭ ॥ દદ્યાદ્ દયાનુપવનો દ્રવિણામ્બુધારા-મસ્મિન્નકિઞ્ચનવિહઙ્ગશિશૌ વિષણ્ણે । દુષ્કર્મઘર્મમપનીય ચિરાય દૂરં નારાયણપ્રણયિની નયનામ્બુવાહઃ ॥ ૮ ॥ ઇષ્ટાવિશિષ્ટમતયોઽપિ યયા દયાર્દ્રદૃષ્ટ્યા ત્રિવિષ્ટપપદં સુલભં લભન્તે । દૃષ્ટિઃ પ્રહૃષ્ટકમલોદરદીપ્તિરિષ્ટાં પુષ્ટિં કૃષીષ્ટ મમ પુષ્કરવિષ્ટરાયાઃ ॥ ૯ ॥ ગીર્દેવતેતિ ગરુડધ્વજભામિનીતિ શાકમ્ભરીતિ શશિશેખરવલ્લભેતિ । સૃષ્ટિસ્થિતિપ્રલયકેલિષુ સંસ્થિતાયૈ તસ્યૈ નમસ્ત્રિભુવનૈકગુરોસ્તરુણ્યૈ ॥ ૧૦ ॥ શ્રુત્યૈ નમોઽસ્તુ નમસ્ત્રિભુવનૈકફલપ્રસૂત્યૈ રત્યૈ નમોઽસ્તુ રમણીયગુણાશ્રયાયૈ । શક્ત્યૈ નમોઽસ્તુ શતપત્રનિકેતનાયૈ પુષ્ટ્યૈ નમોઽસ્તુ પુરુષોત્તમવલ્લભાયૈ ॥ ૧૧ ॥ નમોઽસ્તુ નાલીકનિભાનનાયૈ નમોઽસ્તુ દુગ્ધોદધિજન્મભૂત્યૈ । નમોઽસ્તુ સોમામૃતસોદરાયૈ નમોઽસ્તુ નારાયણવલ્લભાયૈ ॥ ૧૨ ॥ નમોઽસ્તુ હેમામ્બુજપીઠિકાયૈ નમોઽસ્તુ ભૂમણ્ડલનાયિકાયૈ । નમોઽસ્તુ દેવાદિદયાપરાયૈ નમોઽસ્તુ શાર્ઙ્ગાયુધવલ્લભાયૈ ॥ ૧૩ ॥ નમોઽસ્તુ દેવ્યૈ ભૃગુનન્દનાયૈ નમોઽસ્તુ વિષ્ણોરુરસિ સ્થિતાયૈ । નમોઽસ્તુ લક્ષ્મ્યૈ કમલાલયાયૈ નમોઽસ્તુ દામોદરવલ્લભાયૈ ॥ ૧૪ ॥ નમોઽસ્તુ કાન્ત્યૈ કમલેક્ષણાયૈ નમોઽસ્તુ ભૂત્યૈ ભૂવનપ્રસૂત્યૈ । નમોઽસ્તુ દેવાદિભિરર્ચિતાયૈ નમોઽસ્તુ નન્દાત્મજવલ્લભાયૈ ॥ ૧૫ ॥ સમ્પત્કરાણિ સકલેન્દ્રિયનન્દનાનિ સામ્રાજ્યદાનવિભવાનિ સરોરુહાક્ષિ । ત્વદ્વન્દનાનિ દુરિતાહરણોદ્યતાનિ મામેવ માતરનિશં કલયન્તુ નાન્યત્ ॥ ૧૬ ॥ યત્કટાક્ષસમુપાસનાવિધિઃ સેવકસ્ય સકલાર્થસમ્પદઃ । સન્તનોતિ વચનાઙ્ગમાનસૈસ્ત્વાં મુરારિહૃદયેશ્વરીં ભજે ॥ ૧૭ ॥ સરસિજનિલયે સરોજહસ્તે ધવલતમાંશુકગન્ધમાલ્યશોભે । ભગવતિ હરિવલ્લભે મનોજ્ઞે ત્રિભુવનભૂતિકરિ પ્રસીદ મહ્યમ્ ॥ ૧૮ ॥ દિગ્ઘસ્તિભિઃ કનકકુમ્ભમુખાવસૃષ્ટ-સ્વર્વાહિનીવિમલચારુજલપ્લુતાઙ્ગીમ્ । પ્રાતર્નમામિ જગતાં જનનીમશેષલોકાધિરાજગૃહિણીમમૃતાબ્ધિપુત્રીમ્ ॥ ૧૯ ॥ કમલે કમલાક્ષવલ્લભે ત્વં કરુણાપૂરતરઙ્ગિતૈરપાઙ્ગૈઃ । અવલોકય મામકિઞ્ચનાનાં પ્રથમં પાત્રમકૃત્રિમં દયાયાઃ ॥ ૨૦ ॥ સ્તુવન્તિ યે સ્તુતિભિરમીભિરન્વહં ત્રયીમયીં ત્રિભુવનમાતરં રમામ્ । ગુણાધિકા ગુરુતરભાગ્યભાગિનો ભવન્તિ તે ભુવિ બુધભાવિતાશયાઃ ॥ ૨૧ ॥